Kua whuia te kupenga o Taramainuku kia hao i te mate. Kua kohikohia te tau o Te Whare Ariki hei ika tatangi maa te tini, maa te mano.
Kua riro a Kiingi Tuheitia Pootatau Te Wherowhero Tuawhitu ki te maakohakoha o te poo, ki te maarirerire o te poo. Kua kotahi atu ki a nunui maa, ki a roroa maa i te tau o Paengarau.
E te Kiingi, pikitia te pane o Te Mata o Tuutonga, pikitia ngaa tihi o Taupiri Kuao. Tirohia ngaa maunga whakahii o te Motu. Purea too hau ki te maarakiraki, horea too hau ki te maatongatonga. Maiangitia too hau ki te raawhiti, whiuwhiua too hau ki te uru. Pareparea too hauhunga ki Te Kaahui Maunga, kia ia rere mai ki te take o Taupiri e tuu nei.
Whoatu e te Kiingi ki ngoo Waka, ki ngoo Iwi, ki ngoo Hapuu paarangaranga o te Motu.
Houhia too huarahi ki te poo, mana o te poo, tini o te poo. Te poo taiopeope i te tangata, te poo oopeti i te iwi nui tonu.
Rukutia te paringa rua o Mooriaanuku, kauria te moana o aake aake kia tau koe ki te taahuna o Rongomaawhitiwhiti, ki te aakau o Hawaiki whakariterite.
Rire Rire Hau! Paimaarie
